[31/01/2006]/O centrocampista do Pontevedra Clube de Fútbol, Cabrera Cava, será baixa para o encontro da vindeira fin de semana que o cadro granate disputará contra o Móstoles. O futbolista madrileño acumulou o quinto cartón amarelo do seu segundo ciclo sancionador no derradeiro enfrontamento que disputou o pasado domingo contra o Fuenlabrada. Cabrera sumou de tal xeito a súa décima cartulina da tempada e consolídase como o home máis tarxeteado do bloque.
Os servizos xurídicos do Pontevedra desestimaron a posibilidade de realizar alegacións ó acta de González Mateu para evitar a baixa de Cabrera. A acción na que se produciu a decisión do colexiado durante o encontro contra o Fuenlabrada non pode ser rebatida, ante a ausencia de imáxes que amosen a inocencia do número once pontevedrés.
A sanción de Cabrera por cinco cartulinas será a segunda que cumpla no que vai de campaña. Con anterioridade tivo que perderse o enfrontamento que mediu ó Pontevedra ante o Alcalá no estadio de Pasarón, e que se saldou cunha igualada a dous.
Argibay deberá botar man do banquillo para recompoñer o seu equipo inicial ante a falta do seu habitual medio centro de contención. Fran Rico e Organista son os posibles recambios.