[29/08/2006]/Luciano non só perdeu a titularidade no Pontevedra senón tamén o brazalete de capitán no arranque da Liga, algo que aínda que lle fai sentir desasosego o acepta con deportividade ao recoñecer que Ormazábal gañouse o posto a pulso.
O defensa porriñés recoñece que «non xogamos moi ben. Incluso creo que o Ferrol mereceu algo máis, pero ao final o que conta son os goles». «Nós esperabamos -di- facer un fútbol máis vistoso, máis bonito, como estabamos acostumados o ano pasado, pero eles presionaban moi arriba e aí tiñan xente boa, rápida, e custábanos moito saír co balón controlado».
Luciano agardaba que, tralas dezasete fichaxes do Racing, notase que o Pontevedra estaba máis acoplado. «A verdade -admite tralo partido- é que foi un pouco raro que non se notasen eses mecanismos de traballar máis tempo xuntos, pero era un derbi e son diferentes aos outros partidos da Liga. Sobre todo, a motivación é diferente e eu penso que igual foi por iso».
¿Cómo encaixa a suplencia? «A verdade -responde- é que estou cabreado comigo mesmo e con gañas de traballar para que o míster volva a confiar en min. Agora tócame a min esta situación, o ano pasado tocáballe a Asier [Ormazábal] e o mínimo que podo facer é respectalo, animalo e apoialo que é o mesmo que facía el o ano pasado comigo».
Descoñece os motivos que lle levaron a perder a titularidade, aínda que sospeita que poida ser porque «estiven toda a pretemporada xogando de central e a verdade é que Asier andaba moi ben e tampouco vexo lóxico que non xogara el porque estivo a un nivel altísimo».
Respecto ao que pode pasar mañá en Vallecas, Luciano asume que «imos saír con tódalas gañas e a ilusión do mundo e intentaremos sacar a eliminatoria adiante xa que é unha competición moi bonita e, despois, nos poden tocar equipos de Primeira». Do batacazo do Raio na Liga dixo que «ninguén o agardaba xa que é un equipo que vai estar arriba. A verdade é que deu unha das sorpresas da xornada».


A Voz de Galicia